Gjashtë poezi nga Agim Gashi

Agim Gashi

Rrugëtim

Mëngjeseve
Ëndrrat m'i shqyejnë qentë
Në mesditë
Kolla e vetmisë
Zogjtë mi trembë
Mbrëmjeve
Kotësia e ditës
Më mbetet në fyt



Fantazmat

S'është gjë zotëri
asgjë s'është 
të çmendur jemi
mos na ngitni
S'është gjë zotëri 
asgjë s'është 
nga varri vijmë
drejt nga varri
S'është gjë zotëri
asgjë s'është 
ku dinë fantazmat
ç'është vatani

Vlorë, '97



Hiç

Asgjë nuk shohim
Po aq ndjejmë
Të verbër jemi prej kohësh
Me shpresë
Të huazuar moteve
Mashtrohemi si mos më keq
E sotmja si ndahet te djeshmes 
E nesërmja pret në muze



Moti në litar

S'ka kohë
Që hyn në kohë
E s'bëhet vrer
Tash ky që jam
S'jam unë
S'e dua shkëlqimin vrasës 
Të metropoleve
I dua këpucët e grisura
Të Kosovës
Dhe një sy gjumë
S'ka kohë
Që hyn në kohë
E s'bëhet vrer
Tash ky që jam
S'jam unë

Gjermani '98



Ajo

Kamerieri më peshon me shikim
Unë paguaj kafenë
Të ëmbël pelin
Athua
Si është sonte Ajo
Mos mu largo
Pikëllim
Sa vite
Hoqe
Ndarjes t'i gjesh shteg
Sa vite
Vetës ia vodhe gjumin
Jetën ta gënjesh
Sa vite
Dashurinë do ta bartesh
Në arkëmort
Mashtrimin tënd ta kuptosh
Mëngjeseve
Ëndrrat m'i shqyejnë qentë
Në mesditë
Kolla e vetmisë
Zogjtë mi trembë
Mbrëmjeve
Kotësia e ditës
Më mbetet në fyt




Bijës sime

Zogu i babushit
Sydielli im
Gjithmonë ëmbël të flesh
Sa herë të fluturosh
E sa herë të biesh
Në pëllëmbë të dorës
Do të më gjesh